У Беларусі плануюць павялічыць мінімальны памер дапамогі пры цяжарнасці і родах
У Беларусі плануюць павялічыць дапамогі, звязаныя з нараджэннем і доглядам дзяцей. Урад ужо падрыхтаваў шэраг заканадаўчых ініцыятываў, апавёў намеснік прэм’ер-міністра Беларусі Ігар Петрышэнка 20 чэрвеня на пасяджэнні палатаў парламенту.
Новаўвядзенні прадугледжваюць павелічэнне мінімальнага памеру дапамогі пры цяжарнасці і родах (для жанчын, якія атрымліваюць адукацыю і пачынаюць працоўную дзейнасць) і дапамогі пры часовай непрацаздольнасці для догляду дзіцяці (для маладых спецыялістаў). Таксама плануюць узмацніць захады для падтрымання семʼяў, якія выхоўваюць дзіця-інваліда.
«Прасіў бы дэпутацкі корпус у магчыма сціснутыя тэрміны завяршыць працу над адпаведным законапраектам, падрыхтаваным цяпер да разгляду Палатаю прадстаўнікоў у другім чытанні», – сказаў віцэ-прэмʼер.
Змены будуць прынятыя з мэтаю «павышэння сацыяльнай абароненасці асобных катэгорыяў семʼяў і ўзмацнення адраснасці выплатаў».
Арсен Рудэнка belsat.eu
