Святлана Ціханоўская сустрэлася з Жузэпам Бурэлем. Абмяркоўвалі візы і легалізацыю
Абраная прэзідэнтка Беларусі Святлана Ціханоўская сустрэлася ў Бруселі з вярхоўным прадстаўніком ЕЗ у справах замежнай палітыкі Жузэпам Бурэлем. Пра гэта паведамляе прэс-служба беларускай лідаркі.
Сустрэча Святланы Ціханоўскай і Жузэпа Бурэля адбылася ў межах працы Кансультацыйнай групы «Беларусь – Еўразвяз». Абмяркоўваліся працяг і павелічэнне падтрымання грамадзянскай супольнасці Беларусі, прыцягненне рэжыму Аляксандра Лукашэнкі да адказнасці, развіццё працы Кансультацыйнай групы, супраца ў супрацьдзеянні прапагандзе, а таксама прасоўванне еўрапейскага выбару сярод беларусаў.
«Асобна ўздымалася пытанне працягу выдачы шэнгенскіх візаў і дапамогі з легалізацыяй беларусаў і беларусак у выгнанні. Рабіўся акцэнт на важнасці адкрытых межаў і мабільнасці тых, хто застаецца ўнутры краіны», – гаворыцца ў заяве прэс-службы Ціханоўскай.
Паведамляецца, што напрыканцы сустрэчы Жузэп Бурэль прапанаваў правесці беларуска-еўрапейскую канферэнцыю на тэму пераадольвання крызісу ў Беларусі.
A pleasure to meet again with Sviatlana @Tsihanouskaya.
I conveyed my appreciation for the work of the democratic forces under her leadership & reconfirmed the EU’s solidarity and support for those striving for a free and democratic Belarus. pic.twitter.com/5EbyY8Hyw8
— Josep Borrell Fontelles (@JosepBorrellF) June 25, 2024
Кіраўнік дыпламатыі ЕЗ пракаментаваў сустрэчу з Ціханоўскай на сваёй старонцы ў сацсетцы X.
«Прыемна зноў сустрэцца са Святланай Ціханоўскай. Я выказаў сваю ўдзячнасць за працу дэмакратычных сілаў пад ейным кіраўніцтвам і пацвердзіў салідарнасць і падтрыманне ЕЗ усіх, хто змагаецца за свабодную і дэмакратычную Беларусь», – зазначыў Жузэп Бурэль.
Глеб Нержын belsat.eu
