Валер Кавалеўскі складае з сябе абавязкі намесніка кіраўніцы і прадстаўніка Аб’яднанага пераходнага кабінету ў замежных справах. Пра гэта ён паведаміў у «Фэйсбуку».
Сваю пастанову Валер Кавалеўскі патлумачыў тым, што на гэтым напрамку ў яго «з’явіліся разыходжанні ў стратэгічным бачанні шляхоў дасягнення мэтаў дэмакратычнага руху, у арганізацыі і тактыцы вядзення працы, а таксама ў падыходах да ўнутранай палітыкі».
Кавалеўскі падкрэслівае, што за 3,5 года працы ў Офісе Святланы Ціханоўскай і ў Аб’яднаным пераходным кабінеце зроблена шмат змястоўнай працы ў вонкавай палітыцы і дыпламатыі. «Я ўдзячны Святлане Ціханоўскай за давер і калегам з руху і міжнародным партнёрам за плённую супрацу ў гэтых напрамках», – зазначыў ён.
«Перакананы, што міжнародная дзейнасць мусіць быць толькі дадаткам да працы ў дасягненні зменаў у Беларусі. Менавіта праца з беларускімі грамадзянамі, з беларускім бізнесам, з беларускімі палітычнымі структурамі і грамадскімі ініцыятывамі ёсць найскладанейшым, але і найбольш абгрунтаваным і перспектыўным шляхам дасягнення мэтаў руху: абароны незалежнасці Беларусі, аднаўлення дзяржаўнага суверэнітэту, усталявання канстытуцыйнага парадку ў нашай краіне і пераходу да дэмакратычнай формы кіравання», – заявіў Кавалеўскі.
Кавалеўскі не ўдакладніў, у чым сутнасць ягоных разыходжанняў з Аб’яднанным пераходным кабінетам.
Глеб Нержын belsat.eu