У Еўрапейскай радзе працягваецца абмеркаванне новага санкцыйнага пакету супраць Беларусі, паведаміў журналіст RFE/RL Рыкард Юзьвяк.
«Варта адзначыць, што санкцыям супраць Беларусі дасюль не далі зялёнага святла. Яны ўсё яшчэ абмяркоўваюцца з мэтаю найхутчэйшага дасягнення пагаднення», – напісаў у Х Рыкард Юзьвяк.
Раней у краінаў Еўразвязу ўзніклі рознагалоссі адносна новых санкцыяў супраць Беларусі, якія мусілі быць уніфікаваныя з абмежаваннямі ў дачыненні Расеі. Нямеччына выступіла супраць забароны на пастаўкі дарагіх аўтамабіляў у Беларусь. Таксама ішлося пра тое, каб адкласці ўвядзенне новых абмежаванняў супраць нашай краіны.
20 чэрвеня бельгійскае старшынёўства ў ЕЗ абвесціла, што амбасадары ўсіх 27 краінаў ЕЗ пры Еўрапейскай радзе ўхвалілі 14-ы пакет санкцыяў супраць Расеі. Ён яшчэ мусіць быць афіцыйна зацверджаны на паседжанні Рады ЕЗ у замежных справах, якое адбудзецца 24 чэрвеня ў Люксембурзе. Новы пакет санкцыяў «прадугледжвае новыя мэтавыя захады і максімізуе ўздзеянне ранейшых санкцыяў» супраць Расеі, а таксама ліквідуе шчыліны для іх абыходу.
Прэзідэнтка Еўракамісіі Урзуля фон дэр Ляен назвала новы пакет санкцыяў жорсткім:
«Ён яшчэ больш пазбавіць Расею доступу да ключавых тэхналогіяў і даходаў ад энергетыкі, будзе змагацца з ценявым флотам Пуціна і сеткаю ценявых банкаў за мяжою».
13 чэрвеня Прэзідэнт Злучаных Штатаў Джо Байдэн падпісаў дакумент аб працягу санкцыяў, уведзеных супраць Аляксандра Лукашэнкі і ягонага атачэння яшчэ Джорджам Бушам – малодшым у 2006 годзе.
Прэзідэнт ЗША Джордж Буш – малодшы ў акце выстаўляў рэжыму Лукашэнкі шэраг патрабаванняў: расследаваць знікненне апазіцыйных палітыкаў, вызваліць палітычных вязняў і зняць палітычна матываваныя абвінавачанні. У выпадку невыканання супраць афіцыйнага Менску мусілі быць уведзеныя санкцыі, што і зрабілі ў 2006-м.
З таго часу ЗША не скасоўвалі санкцыяў супраць Беларусі, толькі змякчалі ці прыпынялі, у 2021 годзе аднавілі праз падзеі падчас выбараў-2020 і захоп самалёта «Ryanair». Санкцыі трэба працягваць штогод, што цяпер і зрабіў Джо Байдэн.
Марыя Міхалевіч belsat.eu
