«Сэрцы палякаў адкрытыя, каб дапамагаць», – кажа ў размове з карэспандэнткай «Белсату» Мацей Будка, дырэктар Люблінскага акруговага аддзелу Польскага Чырвонага Крыжа. Менавіта ў Любліне – самы вялікі запас гуманітарнай дапамогі.
«Тут ёсць рэчы першай неабходнасці, якія мы атрымалі, дзякуючы супрацы з нямецкім Чырвоным Крыжам. Гэтыя рэчы былі дастаўленыя нам, калі трывала крызісная сітуацыя на мяжы з Беларуссю, а цяпер іх атрымаюць украінскія ўцекачы», – тлумачыць Будка і дадае, што звычайна склад не выглядае такім пустым.
Чырвонаму Крыжу прыносяць рэчы ў вельмі розным стане. Некаторыя амаль новыя, некаторыя ні для чаго не прыдатныя.
«Лепей аддаваць тое, у чым сам хочаш хадзіць, самае актуальнае і патрэбнае. З досведу папярэдніх збораў – найбольш бракуе добрага абутку, добрых штаноў, непрамакальных. З гэтым найбольшая праблема. Кашулькі і блузы – іх хапае. Важна, каб былі рэчы, якія можна насіць на вуліцы таксама», – тлумачыць супрацонік Польскага Чырвонага Крыжа Конрад Храдіз.
На складзе ёсць школьныя рэчы: сшыткі, альбомы, у будучым маюць з’явіцца заплечнікі, пледы, спальнікі, адзенне.
«Першы этап дапамогі – накарміць і абагрэць, даць дах над галавой. Людзі актыўна ўключыліся ў наш грашовы збор, які дапаможа забяспечыць людзей у доўгачасовай перспектыве. Неўзабаве стартуе збор рэчаў і сродкаў гігіены, харчоў і базавых медыкаментаў для першай і хуткай дапамогі. Мы таксама ўлічваем, што сярод уцекачоў можа быць шмат асобаў з абмежаванай мабільнасцю і дзяцей, якія мусяць працягваць адукацыю і, нягледзячы на сітуацыю, мець шанец на шчаслівае дзяцінства», – мяркуе дырэктар Люблінскага акруговага аддзелу Польскага Чырвонага Крыжа.
Конрад Храдіз апавядае: тут ляжалі стосы рэчаў вышынёй да двух метраў, а валанцёры прыходзілі штодзень і сартавалі адзенне, каб пакінуць толькі прыдатныя для ўжытку рэчы.
«Традыцыйна большую частку года мы займаемся харчовай дапамогай. У Люблінскім ваяводстве мы дапамагаем каля 14 тысячам асобаў. Маем для арганізацыі гэтага працэсу добрыя варункі, – кажа Мацей Будка. – Таму ўсе гэтыя рэчы на складзе мы цяжкавікамі можам адпраўляць далей – лагістычна арганізацыя цалкам падрыхтаваная да сітуацыі».
Акрамя харчоў Чырвоны Крыж мае сродкі дэзынфекцыі, сродкі гігіены. Ложкі, коўдры, спальнікі збольшага захоўваюцца ў іншым пункце каля Любліна. Адзенне са збору для мігрантаў ужо спакаванае і часткова адпраўленае на мяжу.
На складзе ёсць пнеўматычныя намёты, якія хутка раскладаюцца, і асвятленне.
«Калі штосьці здарыцца, мы хутка можам умяшацца ў сітуацыю і пачаць надаваць неадкладную дапамогу. У экстранай сітуацыі таксама спрацуе наша сістэма паведамленняў для валанцёраў, некаторыя з іх адразу прыедуць на месца здарэння і будуць дапамагаць службам ратавання.
Цяжка спрагназаваць, калі будзе вялікая хваля ўцекачоў. Калі Крэмль будзе займаць украінскія гарады, трэба гэтага чакаць. Як далёка прасунуцца Узброеныя сілы Расеі, невядома. Але пры неабходнасці мы гатовыя выслаць Чырвонаму Крыжу ва Украіну наборы першай дапамогі», – падсумоўвае Конрад Храдіз.
ВО, Саша Альтэр, belsat.eu