Беларускі памежны камітэт паведаміў, што за содні ў літоўскім пункце пропуску «Мядзінінкай» аформілі ўсяго 11 % фураў ад нормы і больш за 1200 грузавых аўтаў чакаюць уезду ў Літву. А кіроўцы легкавікоў скардзяцца на вельмі павольны выезд з Літвы. «Белсат» даведаўся, якая сітуацыя на мяжы ў апошнія содні.
Самы загружаны маршрут для грузавых аўтамабіляў праходзіць праз «Мядзінінкай» («Каменны Лог»).
«Яго кантрольныя службы за содні прынялі толькі 57 фураў з 500 магчымых, гэта значыць 2 аўта з 20 на гадзіну», – напісаў раніцай 11 чэрвеня Дзяржпамежкамітэт.
А 16:00 выезду ў Літву на «Каменным Логу» чакалі 560 фураў, а ў «Беняконях» – 640.
Яшчэ больш фураў сабралася ў «Грыгораўшчыне» – 690. Гэта адзіны адкрыты пункт пропуску на мяжы з Латвіяй.
«Праз гэты памежны пераход на сумежную тэрыторыю прайшло 50 % аўтаў», – распавядае Дзяржпамежкамітэт.
У бок Польшчы чэргаў з грузавых аўтамабіляў няма.
Апрача таго, на ўездзе ў Польшчу нашмат лепшаю зрабілася сітуацыя з аўтобусамі. Раніцай 10 чэрвеня чарга складалася з 50 аўтобусаў, раніцай 11 чэрвеня іх было ўжо 28, а 16:00 у той жа дзень – 20.
У чатах, дзе людзі абмяркоўваюць праходжанне межаў з ЕЗ, пішуць, што ад пасадкі ў аўтобус у Берасці да прыезду ў Варшаву раніцай 11 чэрвеня прайшло амаль 24 гадзіны.
Паводле звестак Дзяржпамежкамітэту, чэргаў з аўтобусаў больш нідзе няма. У чатах пішуць, што за апошнія содні праходжанне мяжы ў бок Літвы займала да 9 гадзінаў, а ў бок Беларусі – да 8 гадзінаў.
З легкавымі аўтамабілямі сітуацыя больш складаная. А 16:00 у «Берасці» ў бок Польшчы сабралася 250 аўтаў. На выездзе ў Літву ў «Каменным Логу» стаіць 110 машынаў, а ў «Беняконях» – 90. Каля «Грыгораўшчыны» – усяго 15 аўтаў.
Прычым на мяжы з Літвой даводзіцца доўга чакаць з абодвух бакоў. Людзі, якія едуць у Беларусь на аўтамабілі, скардзіліся, што амаль нікога не прапускаюць.
«Мы стаім пятнаццатыя з 5:30 раніцы, руху няма, усярэдзіне ўсё калом, працуе адзін канал на ўсіх», – пішуць а 10-й гадзіне раніцы 11 чэрвеня.
Яшчэ адзін чалавек піша, што выглядае ўсё так, быццам у Беларусь пускаюць адну машыну на гадзіну.
Тыя, хто праязджалі на аўтамабілі латышскую мяжу, кажуць, што ў бок Латвіі спатрэбілася правесці на мяжы 4 гадзіны, а ў бок Беларусі была чарга недзе з 90 машынаў.
Арсен Рудэнка belsat.eu
