«У нашых народаў адна мэта: еўрапейская будучыня». Ціханоўская працягвае афіцыйны візіт у Малдову
20 кастрычніка Святлана Ціханоўская прыехала ў Малдову на запросіны прэзідэнткі Маі Санду. Беларуская лідарка сустрэлася са старшынём парламенту рэспублікі і з парламенцкаю групаю «За дэмакратычную Беларусь».
Афіцыйны візіт абранай прэзідэнткі Беларусі ў Малдову – першы ў краіны СНД.
Як паведамілі «Белсату» ў Офісе Святланы Ціханоўскай, лідарка ўжо сустрэлася са старшынём парламенту Ігарам Гросу. Яны дамовіліся пра ўзаемнае падтрыманне на міжнародных пляцоўках і канстатавалі, што ў беларускага і малдаўскага народаў «аднолькавая мэта – еўрапейская і заможная будучыня для нашых краінаў».
Апроч таго, Ціханоўская папрасіла зладзіць прававую экспертызу некаторых законапраектаў, распрацаваных дэмакратычнымі сіламі Беларусі, з улікам таго, што Малдова цяпер прыводзіць свае нарматыўныя дакументы да еўрапейскіх стандартаў.
Таксама палітыкі абмеркавалі сітуацыю ў рэгіёне, вайну ва Украіне, суўдзел рэжыму Лукашэнкі і неабходнасць выбудоўваць новую сістэму бяспекі ў Еўропе, дамовіліся зарганізаваць супольную канферэнцыю ў пытаннях нейтралітэту.
«Агрэсія Расеі паказала, што стратэгія нейтралітэту, на якую рабілі стаўку і Беларусь, і Малдова, не працуе. І каб абмеркаваць гэтую праблему, дамовіліся зрабіць агульную канферэнцыю», – пракаментаваў дарадца абранай прэзідэнткі Анатоль Лябедзька.
Ігар Гросу далучыўся да акцыі падтрымання беларускіх палітычных вязняў і падпісаў для іх паштоўкі.
Святлана Ціханоўская таксама сустрэлася з парламенцкаю групаю «За дэмакратычную Беларусь», створанаю роўна год таму. Дэпутаты заявілі пра гатовасць далучыцца да Дня салідарнасці 12 лістапада і прыйсці да беларускай амбасады ў Кішынэве з партрэтамі палітычных вязняў.
Бакі абмеркавалі супрацу ў міжнародных парламенцкіх арганізацыях, супрацьдзеянне расейскай прапагандзе, а таксама супрацу з беларускаю дыяспарай у Малдове.
Адзін з удзельнікаў групы, дэпутат Віталь Гаўрук з беларускім і малдаўскім грамадзянствам, сказаў на сустрэчы: «У мяне два грамадзянствы і дзве прэзідэнткі: Мая Санду і Святлана Ціханоўская». Ён папрасіў выдаць яму новы пашпарт, бо хоча быць грамадзянінам вольнай Беларусі, «грамадзянінам Беларусі Ціханоўскай, а не Лукашэнкі».
Сяргей Крот belsat.eu
