Міністры замежных справаў ЕЗ абмяркуюць узмацненне рэпрэсіяў у Беларусі 19 лютага. Гэта будзе адное з пытанняў на штомесячнай сустрэчы, паведамляе МЗС Польшчы.
«Удзельнікі абмяркуюць падтрыманне Кіева ў адбіцці расейскай агрэсіі, а таксама наступнае аднаўленне Украіны. У цэнтры ўвагі міністраў замежных справаў краінаў ЕЗ будзе таксама сітуацыя на Блізкім Усходзе і ў Чырвоным моры, дзе не спыняюцца напады хусітаў на гандлёвыя судны.
Акрамя таго, міністры ўздымуць тэму Беларусі, дзе назіраецца беспрэцэдэнтнае ўзмацненне рэпрэсіяў супраць насельніцтва, а менскі рэжым працягвае прымаць захады, каб дэстабілізаваць сітуацыю з бяспекаю ў рэгіёне», – піша МЗС Польшчы.
У студзені сілавікі ўчынілі масавыя рэпрэсіі супраць былых палітвязняў і блізкіх палітычных зняволеных. Паводле звестак праваабаронцаў, за 23 і 24 студзеня праз рэпрэсіі прайшлі больш за 200 асобаў. Паводле сузаснавальніка фонду «BYSOL» Андрэя Стрыжака, пасля гэтага «BYSOL» эвакуяваў з Беларусі 35 асобаў.
«Шмат людзей, якія яшчэ раніцай былі ўпэўненыя, што ў іх жыцці нічога не змянілася, а ўжо ўвечары былі на эвакуацыйнай трасе», – распавёў Стрыжак пра асаблівасці апошняй хвалі эвакуацыі.
Арсен Рудэнка belsat.eu
