Ва Украіне з моманту поўнамаштабнага ўварвання Расеі 24 лютага 2022 года былі забітыя 494 малыя і 1052 – параненыя, паведамляе Офіс генеральнага пракурора Украіны.
Васьмігадовая дзяўчынка пацярпела ў апошнія содні – з 11 на 12 ліпеня ў выніку абстрэлу расейцамі Херсону.
Гэтыя лічбы не канчатковыя. Працягваецца праца дзеля ўдакладнення колькасці забітых і пацярпелых у мясцінах вядзення баявых дзеяў і на часова акупаваных і вызваленых тэрыторыях.
Найбольш дзяцей пацярпела ў Данецкай вобласці – 472, у Харкаўскай – 297, Кіеўскай – 129, Херсонскай – 116, Запарожскай – 91, Мікалаеўскай – 89, Днепрапятроўскай – 83, Чарнігаўскай – 71, Луганскай – 67.
831 дзіця лічыцца зніклым без вестак. Акрамя таго, амаль 19,5 тысяч дзяцей былі вывезеныя з тэрыторыі Украіны расейцамі.
Офіс генеральнага пракурора Украіны штодня публікуе зводкі пра загінулых дзяцей. Апошні раз лік павялічыўся ў канцы чэрвеня, калі ў выніку ракетнага ўдару па Краматорску загінулі дзве 14-гадовыя сястры-двайняты і дзве 17-гадовыя дзяўчыны.
«Дзеці вайны» – платформа, на якую можна паведаміць ці знайсці на ёй інфармацыю пра дзяцей, якія пацярпелі ў выніку вайны Расеі супраць Украіны.
Марыя Міхалевіч belsat.eu
