У справаздачы вайсковай выведкі абароннага ведамства Вялікай Брытаніі са спасылкаю на «ByPol» паведамляюць пра пашкоджанне расейскага самалёта А-50 на аэрадроме ў Мачулішчах.
У ведамстве пашкоджанняў самалёта пакуль не пацвердзілі, але імаверную страту A-50 назвалі сур’ёзнаю для расейскага войска, бо самалёт мае вызначальнае значэнне для паветраных аперацыяў.
«ByPol» паведаміў пра два выбухі ды пашкоджанні пярэдняй і сярэдняй частак А-50. Гэта расейская бартавая платформа далёкага радыёлакацыйнага выяўлення і кіравання. Яе роля заключаецца ў выведцы карціны поля бою і забеспячэнне каардынацыі з суседнімі знішчальнікамі», – паведамілі ў брытанскай выведцы.
Паводле выведкі, у расейскай арміі застаюцца толькі шэсць баявых А-50, што яшчэ больш абмяжуе расейскія паветраныя аперацыі.
Да гэтага моманту ні ўлады Беларусі, ні дзяржаўныя СМІ ніяк не пракаментавалі выбухаў на аэрадроме ў Мачулішчах. Аднак заўважаны ўзмоцнены кантроль на беларускіх межах пры выездзе з краіны, сілавікі цікавяцца ўладальнікамі дронаў і шукаюць падазраваных.
Алена Рувіна belsat.eu