Акупацыйныя ўлады паведамляюць, што падчас ракетнай атакі ЗСУ абломкі ўпалі на прыбярэжную паласу Севастопалю. Пацярпелі шмат мірных жыхароў.
Міністэрства абароны РФ заявіла, што па Севастопалі ўкраінцы запусцілі 5 ракетаў ATACMS з касетнымі боепрыпасамі. Чатыры з іх нібыта былі знішчаныя, а пятая ў выніку ўздзеяння сродкаў СПА «адхілілася ад траекторыі палёту з падрывам баявой часткі ў паветры над тэрыторыяй гораду». У выніку пацярпелі мірныя жыхары.
Кіраўнік акупацыйнай адміністрацыі Севастопалю Міхаіл Разважаеў спачатку паведаміў, што загінулі трое. Пазней колькасць загінулых вырасла да пяцярых, трое з іх – дзеці. Раненні і траўмы атрымалі 124 асобы, у тым ліку 27 дзяцей.
Выданне «ASTRA» са спасылкай на мясцовых жыхароў паведамляе, што ў горадзе не ўключалі паветранай трывогі. Таму падчас атакі на пляжы было шмат семʼяў з дзецьмі.
Улады РФ заяўляюць, што ЗСУ нібыта ўчынілі «тэрарыстычную атаку на цывільную інфраструктуру». Разважаеў наракае, што ўкраінскія вайскоўцы «нанеслі ўдар цішком, у той час, калі мірныя жыхары хто вяртаўся са службы, хто ўжо паехаў з дзецьмі на мора». Аднак з заяваў саміх расейскія ўладаў вынікае, што ЗСУ не цэлілі ў мірных жыхароў: цывільныя пацярпелі ў выніку працы расейскіх сілаў СПА, якія збілі ракету над пляжам.
Глеб Нержын belsat.eu
