«Гэта будзе вельмі гучна». Ужо ў наступную суботу адбудзецца Hučna Fest з онлайн-трансляцыяй
Чарговы фестываль Hučna Fest, які робіць фокус на сучасныя культуру і актывізм, адбудзецца 29 чэрвеня ў Варшаве, і беларусы ў краіне змогуць далучыцца да яго праз онлайн-трансляцыю. «Беларусы не мусяць быць сціплымі, тое, што яны робяць, вельмі таленавіта і крута», – кажуць арганізатары. Музычны канцэрт, літаратурная сцэна ды пляцоўка сацыяльных актыўнасцяў разгорнуцца проста на беразе Віслы.
«У нас заўсёды пазітыў, нават у цяжкія часы, наш дэвіз – «смех скрозь слёзы, слёзы скрозь смех», таму сумна дакладна не будзе, будзем танцаваць, зараджаць і настройваць на пазітыў, – кажа музыка Павел Гарадніцкі і заклікае наведнікаў таксама танцаваць і падпяваць. Гурт «Разбітае сэрца пацана» – адзін з хэдлайнераў сёлетняга Hučna Festu, хлопцы абяцаюць выканаць «залатыя хіты РСП» і, калі на гэта хопіць часу, некалькі трэкаў з новай праграмы.
«Мы іх выконвалі 1 чэрвеня на канцэрце ў Варшаве, і можа быць, сыграем і на фестывалі, бо хочацца іграць нешта новае, – працягвае Павел. – Гэта будзе вельмі гучна, як заўсёды, гэта будзе драйвова, весела, класна, таму далучайцеся ўсе. Проста хочацца, каб людзі гэтыя некалькі гадзін летняга вечара правялі разам са знаёмымі і сябрамі, з любімай музыкай, з файным настроем і на некаторы час, можа, забыліся пра кепскія навіны, пажылі некалькі гадзін у кайф. Таму пабачымся там – кайфанем і адарвемся».
Паводле суарганізатара фестывалю Івана Марозькі, Hučna Fest штогод запрашае ў лайнап тых артыстаў, якія на думку каманды павінны быць пачутыя яшчэ большай колькасцю людзей. «Цягам года мы глядзім, што адбываецца ў музыцы, якія альбомы выходзяць. На маю думку, Сяргей Башлыкевіч запісаў самы моцны альбом мінулага года, мы не маглі яго не паклікаць. А «Разбітае сэрца пацана» – нашы сябры з першага Hučna Festu у Кіеве. Думкі запрасіць Syndrom Samazvanca былі яшчэ летась, але тады ў хлопцаў не атрымалася. Гэта дасведчаныя музыкі, якія стварылі малады гурт, на сёння яны ўжо далі некалькі крутых канцэртаў у Варшаве і летась выпусцілі некалькі вельмі цікавых рэлізаў». У праграме значыцца і інды-поп-гурт Nocny.
Leibonik – яшчэ адзін хэдлайнер музычнай часткі фэсту, летась ягоным сапраўдным хітом стала Emigrant Song, першая песня з першага эмігранцкага альбома музыкаў. «Можна чакаць усе нашыя хіты, – кажа лідар групы Сяргей Башлыкевіч пра будучы канцэрт. – Для нас фармат выступлення менавіта на летнім фестывалі даволі новы, мы, напэўна, упершыню выступаем на адкрытай гарадской пляцоўцы. Таму для гэтага разу рыхтуем больш вясёлую праграму, адрозную ад тура, з якім мы ездзілі ўвосень і дзе ігралі даволі шмат мінорных песень з апошняга альбома. Зараз пераважная большасць песняў будзе пазітыўная, і безумоўна, хацелася б, каб было гучна».
Да сёлетняга фестывалю можна далучыцца з любой кропкі свету праз онлайн-трансляцыю, гэтая магчымасць ладзіцца перадусім для беларусаў, якія жывуць унутры краіны. «Мы разумеем, што ў Беларусі такіх мерапрыемстваў зараз няшмат, і нам важна, каб Hučna Fest быў не толькі для дыяспары, а для ўсіх беларусаў», – кажа Іван Марозька.
Паводле Сяргея Башлыкевіча, гледзячы па праслухоўваннях на даступных у краіне стрымінгах, Беларусь была і застаецца асноўнай аўдыторыяй гурта Leibonik. «Я агулам у першую чаргу арыентуюся на людзей у Беларусі», – кажа музыка, але прызнае, што калі гаворка пра жывы канцэрт, нават вельмі якасная і складана зробленая трансляцыя не зможа перадаць яго атмасферы. «Будзе прыемна, калі людзі далучацца і выкажуць падтрымку праглядамі, мы будзем удзячныя за каментары – гэта будзе асноўны спосаб канэкшана, але хацелася б з усімі калі-небудзь сустрэцца на канцэрце жыўцом, дзе б ні было», – працягвае Сяргей Башлыкевіч.
Іван Марозька тлумачыць, што Hučna Fest – усё-ткі не музычны фестываль у яго класічным разуменні, пад гэтаю назваю абʼядноўваюцца розныя праявы беларускага мастацтва і актывізму. «Гэтымі інструментамі, мовай культуры, выкарыстоўваючы музыку, сучаснае мастацтва, дызайн, літаратуру мы імкнемся паказаць сучасную творчую, крэатыўную Беларусь, дэмакратычную Беларусь, паказаць, што беларусы – еўрапейская, дэмакратычная, вольная, маладая, прыгожая нацыя, менавіта мы, а не рэжым Лукашэнкі, ёсць Беларусь».
Літаратурную сцэну арганізатары ладзяць сумесна з ПЭНам – сёлета яна называецца «Бліжэй да цябе» і прысвячаецца беларускай жаночай і квір-літаратуры. У праграме возьмуць удзел Света Бень, Анхела Эспіноса Руіс, Ганна Кандрацюк, Наста Кудасава, Ганна Янкута, Уладзь Гарбацкі, тоні лашдэн і Артур Камароўскі. «На літаратурнай сцэне будуць і дыскусіі, і перфарматыўныя чытанні, і нават інтэграваны ў гэтую літаратурную сцэну выступ Светы Бень як аўтаркі, яна выступіць са сваім новым праектам WTBSK», – удакладняе Іван Марозька.
Побач на беразе Віслы ў гэты час будуць працаваць кніжныя стэнды беларускіх выдавецтваў і беларускіх НДА. «Для нас у нашай праграме ўсе зоркі гэтага дня, – працягвае Іван. – У фестывалю ёсць слоган – «Час быць гучным!», мне здаецца, тое, што робяць беларусы – вельмі таленавіта і крута, і беларусы не мусяць быць сціплымі».
Фестываль распачнецца на беразе Віслы (Wybrzeże Kościuszkowskie 22) а 13 гадзіне 29 чэрвеня, музычная частка працягнецца да 22 гадзіны. «Белсат» з’яўляецца інфармацыйным партнёрам Hučna Fest.
