На чэмпіянаце Еўропы па футболе ў Нямеччыне завяршыўся першы тур групавога этапу. Падводзім яго вынікі. Чым здзівілі гаспадары, чаму расчаравалі англічане, хто забіў самы хуткі гол у гісторыі – гэтыя і іншыя моманты ў нашым аглядзе.
Нямеччына – Шатландыя 5:1, Швейцарыя – Вугоршчына – 3:1.
Гульня ў дзень адкрыцця паміж немцамі і шатландцамі выйшла яркай і прайшла пад поўным кантролем гаспадароў. Яе лёс немцы вызначылі яшчэ ў першым тайме, забіўшы тройчы запар. Першы гол у фінальным турніры «Еўра-2024» на рахунку новай зоркі сусветнага футболу – Флёрʼяна Вірца. 21-гадовы паўабаронца ўжо выгуляў моладзевы чэмпіянат Еўропы, а сёлета правёў фантастычны сезон – ягоны «Баер» (Левэркузэн) здабыў на радзіме ўсе магчымыя трафеі і дабраўся да фіналу Лігі Еўропы, выдаў серыю без паразаў у 51 гульні, а сам Вірц значна падняў свой трансферны кошт да 130 мільёнаў еўраў. У выніку немцы перамаглі з лікам 5:1. Пры гэтым было забіта сем галоў, але адзін з іх не залічылі, а яшчэ аднойчы абаронца мадрыдскага «Рэалу» Антоньё Рудыгер выпадкова пацэліў у сваю браму. Пазней у сеціве жартавалі, называючы яго найлепшым бамбардзірам «Еўра» ў складзе зборнай Шатландыі.
У іншай гульні гэтай групы Швейцарыя з лікам 3:1 перамагла Вугоршчыну. У выніку гэтыя каманды заявілі пра свой намер згуляць у плэй-оф. Цяпер для гэтага ім дастаткова выгуляць адну гульню з дзвюх, што засталіся. Працяг спаборніцтваў у гэтай групе ўжо сёння, 19 чэрвеня, калі згуляюць Нямеччына і Вугоршчына, Швейцарыя і Шатландыя.
Іспанія – Харватыя – 3:0, Італія – Албанія – 2:1.
Усе чакалі сапраўднай бітвы ад гульні іспанцаў і харватаў, але ўсё скончылася буйной перамогай іспанцаў – 3:0. Вынік яны зрабілі за 16 хвілінаў да канца першага тайму. Спачатку забіў Марата з мадрыдскага «Атлетыка», потым Руіс з французскага ПСЖ, а кропку паставіў абаронца мадрыдскага «Рэалу» Даньель Карвахаль, той самы, якія нядаўна забіў у фінале Лігі чэмпіёнаў. Пасля гульні лідар харватаў Лука Модрыч ды іншыя гульцы гэтай зборнай выглядалі вельмі разгубленымі.
А ў другой гульні гэтага квартэту вогненны матч выдалі італьянцы (дзейныя чэмпіёны Еўропы) і албанцы. Яшчэ нядаўна Албанія лічылася аўтсайдарам і саступала ў футболе Беларусі, але з таго часу шмат чаго змянілася. Краіна прыехала ўжо на другое сваё «Еўра», а стадыён у Дортмундзе на 70 % запоўнілі яе заўзятары, было адчуванне, што гульня адбываецца не ў Нямеччыне, а ў Тыране. Цікава, што албанцаў у свеце 6,5 мільёна, і толькі крыху больш за 2 мільёны жывуць у самой Албаніі.
Адзначым, што ў стартавым складзе краіны выйшлі адразу пяць футбалістаў, якія гуляюць у італьянскай серыі «А», і ўжо на 23-й секундзе адзін з іх – Нэдым Байрамі – адкрыў лік. Цяпер гэта самы хуткі гол у гісторыі чэмпіянатаў Еўропы. Цікавы факт, што цэлых 28 гадоў рэкорд належаў беларусу. У 1988 годзе Сяргей Алейнікаў пацэліў у браму зборнай Англіі на 2-й хвіліне і 7-й секундзе. Рэкорд беларуса толькі ў 2016 годзе пабіў ірландзец Робэрт Брэйдзі.
Італія даволі хутка вярнулася ў гульню, выйшла наперад, утрымала пераможны лік і паказала, што яна адзін з фаварытаў «Еўра-2024».
Англія – Сербія 1:0, Славенія – Данія 1:1.
У зборнай Англіі – самая лепшая на гэтым турніры атака, але каманда гуляе ў сапраўды антыфутбол. Адзіны гол у матчы Англіі і Сербіі ўзнік дзякуючы майстэрству Джуда Бэлінгэма, а гульня ўсталявала антырэкорд у гісторыі «Еўра» паводле колькасці стрэлаў у браму: іх на дваіх было ажно 11. А перад гульнёю сербскія фанаты, сярод якіх нямала расейцаў, справакавалі бойку з англічанамі.
У другім матчы гэтай групы нічыёй, 1:1, скончыўся двубой славенцаў і датчанаў. Аўтар голу зборнай Даніі – Крыст’ян Эрыксэн, які на мінулым «Еўра» проста на полі перажыў спыненне сэрца і здолеў не толькі захаваць жыццё, але і вярнуцца ў гульню.
Францыя – Аўстрыя – 1:0, Нідэрланды – Польшча – 2:1.
Зборная Аўстрыі не шкадавала ні сябе, не суперніка, яна навязала зборнай Францыі жорсткі футбол. У выніку лідару французаў Мбапэ зламалі нос (і ён прапусціць найбліжэйшыя дзве гульні), а Грызман уляцеў у рэкламны шчыт і разбіў твар. Але аўстрыйцы ўсё ж саступілі, забіўшы мяч ва ўласную браму.
Палякі адкрылі лік у гульні з Нідэрландамі, але перамогу выпусцілі з рук у самай канцоўцы. Аднак польскія заўзятары адзначылі, што гульня зборнай выйшла на новы ўзровень, і гэта без лідара каманды – траўмаванага Робэрта Левандоўскага.
Украіна – Румынія – 0:3, Славаччына – Бельгія – 1:0
Жарты пра гэта зʼявіліся ў сеціве пасля бязвольнай паразы Украіны ад Румыніі – 0:3. А ў іншым матчы гэтай групы нарадзілася сапраўдная сенсацыя: Славаччына перамагла Бельгію з лікам 1:0. Цікава, што форвард бельгійцаў Рамэлю Люкакю адказаў на гэта галявым дублем, але абодва мячы былі адмененыя пасля прагляду VAR.
Турцыя – Грузія – 3:1, Партугалія – Чэхія – 2:1.
Першы матч у сваёй гісторыі ў фінальным турніры «Еўра» правялі грузіны. Яны згулялі са сваймі суседзямі з Турцыі. Шмат хто назваў гэтую гульню найлепшай на турніры. Грузіны згулялі так, як жывуць – святочна, ярка і прыгожа – і хоць саступілі 1:3, выклікалі сімпатыю ў публікі. Захапіла, прынамсі, тое, што на дваіх каманды зрабілі 36 удараў у браму.
У іншай гульні гэтай групы Чэхія дала сапраўдны бой Партугаліі. Чэхі адкрылі лік, а ўдача была на баку суперніка: Партугалія здабыла перамогу ў самай канцоўцы гульні.
Наш зямляк Дзяніс разам са сваім сябрам вырваўся на пару дзён у Нямеччыну, а пасля распавёў пра свае ўражанні «Белсату».
– Быў у Берліне і Гамбургу. На самыя матчы мы ўжо не трапілі, бо квіткі на іх даўно распрададзеныя, а ў перакупаў кошты вельмі высокія. І мы пастанавілі, што можна глядзець футбол у фан-зонах, пагатоў, з майго досведу, там заўжды весела. У Берліне ёсць дзве фан-зоны, яны побач адна з адной. Мы трапілі на гульню Іспанія – Харватыя. Была класная атмасфера, людзі разам пілі піва, спявалі. Харватаў было крыху болей. Адзінае, што піва каштавала 6 еўраў за куфаль. Лічу, што гэта крыху зашмат. Потым мы глядзелі матч Албанія – Італія, там стаяў куб з чатырма экранамі. На наступны дзень мы паехалі ў Гамбург – там быў матч палякаў з галандцамі. У гэтым горадзе фан-зона троху горшая, там менш экранаў, чым у берлінскіх. Уразіла колькасць галандцаў, і ўсе ў памаранчавым! Калі іх каманда на апошніх секундах забіла пераможны гол, яны зладзілі сапраўдную дыскатэку.
Другі тур групавога этапу «Еўра» пачынаецца 19 чэрвеня.
Алесь Ляўчук belsat.eu