Новыя палітвязні, новыя «экстрэмісты» і новыя тэрміны. Рэпрэсіі ў Беларусі 18 жніўня
Праваабаронцы прызналі палітвязнямі яшчэ 7 асобаў. Цяпер у спісе палітзняволеных 1496 прозвішчаў. Пра гэта – у аглядзе «Белсату», прысвечаным чарговым фактам палітычнага пераследу.
Праваабарончы цэнтр «Вясна» прызнаў палітвязнямі яшчэ 7 асобаў. У спіс улучаныя Юлія Дзенісевіч, Ганна Шырвель, Мікалай Машарскі, Андрэй Мірашнічэнка, Ягор Захарчук, Анатоль і Івана Багавікі. Цяпер у Беларусі 1496 палітвязняў.
Жыхара Скідзелю, які вярнуўся з Польшчы, пасадзілі на 6 гадоў за каментары. Такі вырак агучыў суддзя Гарадзенскага абласнога суда Віктар Сянько. Паводле версіі абвінавачвання, Міхаіл Мякека сваімі допісамі ў Telegram-чатах «распальваў варожасць, арганізоўваў групавыя дзеянні, што груба парушаюць грамадскі парадак, пагражаў гвалтам службовым асобам і паклёпнічаў на Лукашэнку». Мужчына будзе адбываць тэрмін у калоніі ўзмоцненага рэжыму.
У Камянецкім раёне адбыўся суд над жыхаром Высокага Уладзімірам Прылуцкім, якога абвінавацілі ў пашкоджанні чыгункі каля польскай мяжы. Суддзя Аксана Шкель прызначыла яму 1,5 года калоніі. Паводле версіі следства, сёлета ў красавіку мужчына пашкодзіў чыгуначныя шляхі і сістэму сігналізацыі на ўчастку Берасце – Высока-Літоўск. Прылуцкі віну прызнаў і кампенсаваў нанесеную шкоду.
Павел Мажэйка абскардзіў прысуд у Вярхоўным судзе. У ліпені журналісту разам з адвакаткаю Юліяй Юргілевіч прызначылі 6 гадоў калоніі за «спрыянне экстрэмісцкай дзейнасці» нібыта за перадачу звестак «Белсату».
Палітвязень Сяргей Ціханоўскі чацвёрты год запар сустрэў дзень народзінаў за кратамі. Сёння яму споўнілася 45 гадоў. Палітык адбывае тэрмін у 19,5 года ў калоніі ўзмоцненага рэжыму. Абраная прэзідэнтка Святлана Ціханоўская, жонка палітзняволенага, напісала кранальны зварот да яго.
На палітзняволенага Сцяпана Латыпава ўзмацнілі ціск у турме. Як стала вядома праваабаронцам, гэта адбываецца пра любую публічную ўвагу да яго. Адной з такіх нагодаў стала прысутнасць на публічным мерапрыемстве чалавека ў цішотцы ў падтрымку Сцяпана. Зараз палітвязень утрымліваецца ў адзіночнай камеры. Лісты даходзяць толькі ад сям’і.
Палітзняволенага філосафа Уладзіміра Мацкевіча перавялі са шпіталя ў турму. У пачатку жніўня ў палітвязню зрабілі планавую аперацыю.
Слесара з Ваўкавыску затрымалі пяць узброеных сілавікоў. «Злачынства» – рэпост матэрыялу аднаго з незалежных рэсурсаў, якія цяперашнія ўлады лічаць «экстрэмісцкім». На Аляксандра Жука завялі адміністрацыйную справу.
Беларуса Дзяніса Хахлова выдварылі з Расеі ў Беларусь. На радзіме яму пагражае крымінальны пераслед за ўдзел у мірнай акцыі пратэсту. Юрыдычна гэта было менавіта выдварэнне, аднак адвакаты называюць гэта «схаванай формай экстрадыцыі, што не адпавядае міжнародным гарантыям правоў чалавека». Мужчыну адвезлі ў ізалятар часовага ўтрымання ў горадзе Круглае на Магілёўшчыне. Імаверна, бліжэйшым часам яго перавядуць у СІЗА.
Міністэрства ўнутраных справаў абнавіла «спіс экстрэмістаў». У пералік дадалі 32 асобы, у тым ліку генеральную дырэктарку TUT.by Людмілу Чэкіну і галоўную рэдактарку Марыну Золатаву. Цяпер у спісе 3178 прозвішчаў.
Акрамя таго, сёння новыя фігуранты з’явіліся ў спісе «экстрэмісцкіх матэрыялаў». Туды ўлучылі Telegram-канал «Хрысціянская візія» і старонку ў Facebook «Страна для жизни».
Колішні кіраўнік аддзелу рэкламы і маркетынгу «Нашай нівы» Андрэй Скурко выйшаў на волю. Палітвязень цалкам адбыў тэрмін у 2,5 года.
Сяргей Крот belsat.eu
