Святлана Ціханоўская ў сваім акаўнце ў Х пракаментавала ўступленне Беларусі ў Шанхайскую арганізацыю супрацы (ШАС).
«Я асуджаю прыняцце Лукашэнкі ў ШАС. Гэтае сяброўства выгаднае толькі рэжыму, а не народу Беларусі. Паважаныя лідары не павінны мець зносінаў з дыктатарам, які тэрарызуе сваіх грамадзянаў. Такія дзеянні паказваюць адсутнасць прыхільнасці да дэмакратычных прынцыпаў у ШАС», – напісала абраная прэзідэнтка Беларусі.
4 ліпеня падчас саміту кіраўнікоў дзяржаваў – сябраў ШАС Беларусь прынялі ў арганізацыю.
Шанхайскую арганізацыю супрацы стварылі 15 чэрвеня 2001 года. У яе ўваходзяць Індыя, Іран, Казахстан, Кыргызстан, Кітай, Расея, Пакістан, Таджыкістан, Узбекістан. Беларусь стала дзясятаю краінаю ШАС.
З 2010 года Беларусь брала ўдзел у ШАС у якасці партнёра ў дыялогу, з 2015-га – у статусе назіральніка. 16 верасня 2022 года на Савеце кіраўнікоў дзяржаваў ШАС у Самаркандзе падпісалі рашэнне пра пачатак працэдуры ўступлення нашай краіны ў арганізацыю. У межах гэтага працэсу Беларусь далучылася да больш як 40 дамоваў.
Паводле кітаіста Артура Харытонава, Лукашэнка плануе атрымаць асабістую выгаду ад удзелу ў арганізацыі.
Марыя Міхалевіч belsat.eu
