Выбары ў Індыі і пацалунак праз плот на мяжы ЗША і Мексікі. Фатаграфіі тыдня

Удзельнікі нясуць вялікі ізраільскі сцяг з зоркаю Давіда падчас штогадовага Маршу жывых на памяць пра ахвяраў Галакосту ў мемарыяле і музеі Аўшвіц-Біркенаў на месцы канцэнтрацыйнага лагеру. Асвенцім, Польшча. 6 траўня 2024 года.

Украінскі вайсковец паветранай выведкі перад запускам беспілотніка ў кірунку Бахмуту, Украіна. 10 траўня 2024 года.

Пажарнікі ратуюць каня з даху дому ў горадзе Каноас. Паўднёвы штат Рыў-Грандзі-ду-Сул сутыкнуўся з хваляю паводак пасля залеваў у Бразіліі. Як мінімум 107 чалавек загінулі ў выніку паводкі, яшчэ 136 лічацца зніклымі без вестак. Каноас, Бразілія. 9 траўня 2024 года.

Чалавек ацэньвае ўзровень вады, лежачы ў ложку ў затопленай мясцовасці ў Гарысе (Garissa). Кенія змагаецца з адною з найгоршых паводак у найноўшай гісторыі. Прынамсі 257 чалавек загінулі і больш за 55 000 былі вымушаныя пакінуць свае дамы. Гарыса. Кенія. 9 траўня 2024 года.

Жанчыны стаяць у чарзе, каб прагаласаваць на выбарчым участку падчас трэцяга этапу ўсеагульных выбараў у Бгапале, Індыя. 7 траўня 2024 года.

Ордуна Кастра, якая жыве ў Паўночнай Караліне і не можа пераехаць у Мексіку, цалуе сваю пляменніцу падчас сямейнай сустрэчы ля памежнага плота, які падзяляе Мексіку і ЗША. 6 траўня 2024 года.

Жанчына плача падчас пахавання свайго сына Назарыя Грынцэвіча, украінскага вайскоўца брыгады «Азоў» з пазыўным Грынка. Назарый быў адным з самых маладых байцоў, якія ўтрымлівалі завод «Азоўсталь» падчас трохмесячнай блакады. Пасля расейскага палону Грынцэвіч вярнуўся ва Украіну ў межах пагаднення наконт палонных. Пазней вайсковец ізноў пайшоў на фронт, дзе загінуў на полі бою. Вінніца, Украіна. 10 траўня 2024 года.

Паліцыя арыштоўвае прапалестынскіх дэманстрантаў каля штогадовай выставы моды Інстытуту касцюму ў Нью-Ёрку, ЗША. 6 траўня 2024 года.