Кіраўнік дэпартаменту грамадзянства і міграцыі МУС Аляксей Бягун паведаміў, што Беларусь пасля 2020 года пакінулі больш за 200 тысяч асобаў. Колькі з іх палітычных уцекачоў, невядома, сказаў міліцэйскі чыноўнік у эфіры ОНТ.
Прадстаўнік Міністэрства ўнутраных справаў Аляксей Бягун паведаміў, што «за 2021–2022 гады пакінулі тэрыторыю Беларусі больш за 200 тысяч грамадзянаў»:
«Гэта розныя прычыны: або від на жыхарства, або рэлакацыя айцішнікаў і іх сямейнікаў і гэтак далей. Натуральна, гэта багата, бо гэта працаздольнае насельніцтва».
Міліцэйскі чыноўнік запэўніў, што дзяржава «ведае кожнага», хто з’ехаў. «Але казаць, што гэта быў выезд з палітычных або непалітычных матываў, не заўсёды карэктна», – сказаў Бягун.
На ягоную думку, «дзяржава заўсёды адкрытая» для беларусаў-эмігрантаў». «Мы ніколі не ставілі перапонаў для вяртання ўласных грамадзянаў», – заявіў міліцэйскі чыноўнік, не згадаўшы выпадкі затрымання беларусаў пасля вяртання на радзіму, у тым ліку наўпрост на мяжы.
Летась, паводле праваабаронцаў «Вясны», сілавікі схапілі не менш як 207 грамадзянаў, якія прыехалі дадому. 18 з іх сталі фігурантамі крымінальных справаў.
Сцяпан Кубік belsat.eu
