Родныя Віктара Бабарыкі трапілі на прыём да адміністрацыі калоніі ў Наваполацку
17 ліпеня родныя палітвязня Віктара Бабарыкі размаўлялі з адміністрацыяй папраўчай калоніі № 1 у Наваполацку. Самога вязня яны так і не пабачылі, паведамляе Telegram-канал палітыка.
Падчас прыёму ў адміністрацыі калоніі № 1 у Наваполацку родныя палітвязня Віктара Бабарыкі даведаліся, што палітвязня цяпер трымаюць у памяшканні камернага тыпу (ПКТ). Туды адпраўляюць як пакаранне за парушэнні і на пэўны тэрмін.
Адміністрацыя калоніі заявіла, што здароўю і жыццю палітвязня нібыта нічога не пагражае. Самога палітыка родныя пабачыць не змаглі. Але адміністрацыя сцвярджае, што перапіска ў ПКТ не забароненая. Вось толькі лістоў ад вязня няма некалькі месяцаў. Тэлефанаванні забаранілі.
Чаму Бабарыку змясцілі ў ПКТ і ці доўга ён там застанецца – невядома.
Раней BELPOL са спасылкай на свае крыніцы паведаміў, што палітзняволенага Віктара Бабарыку, ад якога ўжо больш за два месяцы няма ніякай інфармацыі, трымаюць у памяшканні камернага тыпу наваполацкай папраўчай калоніі № 1.
Алена Аляксандрава belsat.eu
