Аб’яднаны пераходны кабінет агучыў стратэгію санкцыйнага ціску на рэжым Лукашэнкі
Абʼяднаны пераходны кабінет апублікаваў пастанову «Аб працягу працы ў справе санкцыйнага ціску». Дакумент прадугледжвае стратэгію эканамічнага прымусу дзеля эканамічнага ціску на рэжым Лукашэнкі.
Палітыкі Абʼяднанага пераходнага кабінету мяркуюць, што санкцыі неабходныя дзеля таго, каб пазбавіць рэжым Лукашэнкі фінансаў, неабходных для рэпрэсіўнай палітыкі, скіраванай супраць беларусаў, і для ўдзелу ў агрэсіі Расеі супраць Украіны. У Кабінеце адзначаюць, што мэтай санкцыяў ёсць вызваленне палітвязняў, пакаранне вінаватых у гвалце і новыя дэмакратычныя выбары.
Стратэгія апазіцыйных палітыкаў прадугледжвае ўвядзенне шматбаковых і нацыянальных санкцыяў, сектаральных і персанальных абмежаванняў, выпрацоўванне прапановаў для кантролю і адказнасці за парушэнне санкцыйных захадаў.
«Згодна з прынятай стратэгіяй, галоўнымі напрамкамі эканамічнага ціску прызнаюцца: пазбаўленне рэжыму Лукашэнкі крыніцаў паступлення валюты і крэдытных рэсурсаў; блакаванне магчымасцяў для абыходу санкцыяў; замарожванне актываў дзяржавы; пазбаўленне прыбыткаў «гаманцоў» рэжыму; удасканаленне санкцыйных механізмаў», – гаворыцца ў заяве Кабінету.
Кабінет мае намер стварыць сталую працоўную групу і заклікае да супрацы актывістаў і экспертаў.
Адказным за арганізацыю працы дзеля санкцыйнага ціску прызначылі Паўла Латушку.
Алена Аляксандрава belsat.eu
