Выданне «Флагшток» са спасылкаю на крыніцу ў адной са школаў Гомельскай вобласці паведамляе, што ўлады цяпер збіраюць інфармацыю аб украінцах, якія працуюць ва ўстановах адукацыі рэгіёну.
У адпаведнасці з прадпісаннем, установы адукацыі павінны ў чэрвені 2024 года падаць у галоўнае ўпраўленне адукацыі Гомельскага аблвыканкаму звесткі пра ўсіх працаўнікоў, якія атрымалі беларускі пашпарт або від на жыхарства ў Беларусі, пачынаючы з 2014 года.
Навошта Гомельскаму аблвыканкаму спатрэбілася інфармацыя аб украінцах, якія прыехалі ў Беларусь пасля Еўрамайдану, не паведамляецца. Таксама незразумела, чаму чыноўнікі не звярнуліся для збору інфармацыі ў МУС.
Тая ж крыніца дадала, што цікавасць у Міністэрства адукацыі ёсць і да вучняў з Украіны. Гэтак, установам адукацыі неабходна паведамляць аб выхаванцах, якія паступілі на вучобу пасля поўнамаштабнага расейскага ўварвання ва Украіну.
Глеб Нержын belsat.eu